معاشرے دے سارے طبقات اتے شراکت داراں نال رل تے ماحول کوں پلاسٹک دی مضر آلودگی توں پاک کریسوں،دنیادے 47 ملک پلاسٹک بیگز استعمال کائنی کریندے پئے ، وزیر مملکت موسمیاتی تبدیلی زرتاج گل دی پریس کانفرنس

اسلام آباد ۔ 21 اگست (اے پی پی) وزیر مملکت موسمیاتی تبدیلی زرتاج گل آکھیے جو وفاقی دارالحکومت اسلام آباد اچ پلاسٹک پولی تھین بیگز تے پابندی کوں مثال بنڑاتےے ملک دے بئیں حصیں تئیں توسیع ڈتی ویسی ،ایں پابندی کوں حکومتی اونر شپ حاصل اے ۔ایں حوالے نال کہیں کوں قانون ہتھ اچ گھننڑ دی اجازت کائناں ڈیسوں ،حکومت اپنڑی رٹ قائم رکھیسی۔معاشرے دے سارے طبقات تے شراکت داراں نال رل تے ماحول کوں پلاسٹک دی مضر آلودگی توں پاک کریسوں۔ بدھ کوں پریس کانفرنس نال خطاب کریندے ہوئیں انہاں آکھیا جو موجودہ حکومت پلاسٹک نال تھیونڑ آلے گند کوں کھنڈنڑ توں روکنڑ کیتے پلاسٹک دے شاپراں تے پابندی لاتی اے ۔ ایندا آغاز 14 اگست کوں وفاقی دارالحکومت اسلام آباد توں کیتا گے ۔ایں مہم کوں ہک مثال بنڑا تے ملک دے بئے حصیں تئیں ودھایا ویسی ۔انہاں آکھیا جو پلاسٹک دے شاپراں تے پابندی دا اعلان چھی مہینے پہلے کرڈتا گیا ہئی ،اے کوئی اچانک فیصلہ کائنی ،ایں حوالے نال تاجراں کوں وی اعتماد اچ گھدا گیا ہئی تے انہاں کوں آکھیا گیا ہئی جو او پلاسٹک دے شاپر دا متبادل گولن۔انہاں آکھیا کل اتھاں اسلام آباد اچ ہک فوڈ چین دے نال پلاسٹک بیگز دے استعمال تے پابندی دے معاملے تے مسئلہ بنڑیے ، انہاں کوں پہلے نوٹس ڈتا ہئی ، وزارت موسمیاتی تبدیلی دے افسر اپنڑے ذاتی کم کیتے کائناں بلکہ قانونی ذمے واری پوری کرنڑ گئے ہن،انہاں نال تعاون کیتا ونجے ۔انہاں آکھیے کوئی وی قانون توں اتے کائنی ہر بندہ جواب دہ اے ۔ پلاسٹک دے شاپر تے پابندی دے فیصلے دی اونر شپ حکومت ڈے ہے ایں حوالے نال کوئی حکومت دی رٹ کوں چیلنج نہ کرے ۔انہاں آکھیا جو عوام دے تعاون دے بغیر کوئی وی اقدام فائدہ مند ثابت کائنی تھی سگیا ۔انہاں آکھیے وزیر اعلیٰ پنجاب وی صوبے اچ پلاسٹک دے شاپراں تے پابندی دا اعلان کیتے جڈاں جو کے پی کے اتے گلگت بلتستان اچ پہلے ہی ایں حوالے نال کم تھیندا پئے ۔سندھ دے وزیر اعلیٰ وی پابندی دا اعلان کیتے ۔ وزیر مملکت آکھیا جو گزریل ڈینھ کابینہ دے اجلاس اچ وزارت موسمیاتی تبدیلی ولوں ڈو تجویزاں پیش کیتیاں گیاں جیں اچوں پہلی وزارت دا چینل بنڑاونڑ متعلق اے تاں جو محکمے دے ذریعے لوکاں کوں موسم دی پیشگی اطلاع وختی ڈتی ونجے ،ڈوجھی تجویز درخت لاونڑ دے نال نال پہلے توں موجود درختاں کوں کٹائی توں روکنڑ متعلق اے ۔ایں سلسلے اچ اے تجویز ڈتی گئی اے جو جیرھے علاقیں اچ لوک مجبوراً ایندھن کیتے درخت کپی ویندے اتھاں سولر چلہے ڈتے ونجن ،کابینہ ڈوہیں تجویزاں دی تعریف کیتی اے ۔انہاں آکھیا دنیا دے 47ملک شاپر دے تھیلے استعمال کائنی کریندے پئے ،پاکستان وی شاپر دے تھیلے بغیر رہ سگدن ۔